Daga: Abbas Yakubu Yaura
Majalisar gudanarwa ta Jami’ar Jos ta amince da nadin Tanko Ishaya a matsayin sabon shugaban jami’ar.Kafin nadin nasa dai Farfesa Ishaya ya kasance mataimakin shugaban jami’ar Jos.
A wata sanarwa da Abdullahi Abdullahi, mataimakin magatakardar yada labarai na jami’ar ya fitar, yace nadin sabon VC ya biyo bayan la’akari da shawarar da majalisar hadin gwiwa da hukumar zaben majalisar dattawa ta bayar a wajen taro na musamman na majalisar da aka gudanar a ranar Juma’a.Nadin nasa wanda ake sa ran zai fara aiki daga ranar 1 ga watan Disamba, 2021, inda zaiyi wa’adi na tsawon shekaru biyar.
Sabon shugaban da aka nada,ya kasance Farfesa ne a Kimiyyar na’ura mai kwakwalwa tare da ilimin lissafi da ƙwarewa da kuma gogewa a bangaren Injiniyan Bayanai, Tsaron na’ura mai kwakwalwa da kuma bincike.
Jaridar Dimokuradiyya ta rawaito cewa “Daga baya sabon shugaban ya samu digirin digirgir a fannin na’ura mai kwakwalwa wanda ya kammala a shekarar 2001. sannan Farfesa Tanko ya samu mukamin Farfesa a fannin na’ura mai kwakwalwa a shekarar 2012.”Idan dai ba a manta ba a ‘yan watannin da suka gabata rikici ya barke a majalisar gudanarwar cibiyar kan wanda zai zama sabon shugaban jami’ar na gaba a makarantar.
