An Tsinci Jaririya A Makurdi Na Jihar Benue

An tsinci wata jaririya a cikin bakar jakar polythene a hanyar gona a kauyen Adaka da ke karamar hukumar Makurdi a jihar Benue.

Wata mai suna Joy Kwatse da ta ceto jaririyar ta shaida wa manema labarai a wata hira da aka yi da ita cewa, za ta je gonarta ne, bayan ruwan sama, sai ta hango jakar.

Ta ce, “ Sai na lura cewa jaririya ce ke gwagwarmayar rayuwa. ko’ina a jikinta duk Cizon tururuwa ne.

“ Na dauke ta Na wuce ofishin ’yan sanda dake yankin, daga baya suka kai ni hedikwatar rundunar, inda suka dauki bayanina suka ce in kai jaririn asibiti, domin yi masa magani cikin gaggawa.”

“Kuma Mun dauke ta zuwa wani alibitin Yara Mai suna Olive Vine Children Health Centre da ke SS8 Kwararafa Quarters, kusa da titin Atiku Abubakar dake garin Makurdi.”

Da aka tuntubi jami’ar hulda da jama’a na ‘yan sanda (PPRO), DSP Catherine Anene, ta bayyana a wani sako na WhatsApp cewa, ba ta da labarin faruwar lamarin.