By Abbas Yakubu Yaura
An binne gawarwakin mutane fiye da 100 da suka mutu a sakamakon fashewar wata tankar mai a Saliyo a makon jiya a wani biki da aka yi a ranar Litinin a makabartar Waterloo.
An kwashe akwatunan a cikin motocin sojoji daga dakin ajiye gawa na Freetown babban birnin kasar zuwa makabartar dake Waterloo, wani birni mai makwabtaka.Motocin sun wuce wurin da fashewar ta afku, inda jama’a suka tsaya a kan titi domin jajantawa wadanda abin ya shafa.
A makabartar, ‘yan uwa da ma’aikata sanye da kayan kariya don binne gawarwakin sun bi motocin suna kuka tare da rufe fuskokinsu.
An jera akwatunan gawa da dama da aka lullube da tutar kasar Saliyo da aka rubuta “kuka sance cikin aminci “, yayin bikin daya samu halartar shugaban kasar Saliyo Julius Maadia Bio, da sauran jami’ai.
“Za mu binciki abin daya faru,” in ji Bio a wani gajeren jawabi yayin jana’izar kuma ya yi kira ga hukumomi da al’umma dasu hada kai don ganin abin da za mu iya yi domin dakile wadannan bala’o’i daga faruwa a gare mu.
Jaridar Dimokuradiyya ta rawaito cewa Fashewar ta faru ne da yammacin ranar Juma’a, a lokacin da wata tankar mai ta yi karo da wata babbar mota a lokacin da take shiga wata tashar iskar gas dake kusa da wata mahadar jama’a a Wellington, dake gabashin babban birnin kasar, a cewar Hukumar Kula da Bala’i ta Kasar.
Motar dakon mai ta fashe, inda ta kashe mutane sama da 100 tare da jikkata wasu da dama, bayan da jama’a da dama suka taru domin tattara man dake kwarara, kamar yadda jami’ai da shaidu suka bayyana.
A cikin wannan kasa mai fama da talauci, har yanzu jama’a sun yi ta tururuwa domin diban mai, in ji shaidu. Kawo yanzu dai ba a san abin daya jawo tashin man da ke kwarara ba amma ba, sai dai ba dadewa ba wani katuwar fashe ta biyo baya.
