Babbar Sakatariyar Hukumar yada labarai da al’adun gargajiya ta jihar Kano, Hajiya Hafsat Iliyasu ta yabawa gwamnatin jihar kan kokarin ta na daukar nauyin ‘yan Koroson jihar masu wasan kasa da kasa zuwa bukin wasannin gargajiya da ake kira (Royal Edinburgh Military Tattoo) na shekara ta 2019, wanda za ayi a birnin Edingburh a kasar Scotland.
Tayi yabon ne lokacin da tawagar ‘yan wasan suka kai mata ziyara kafin su kama hanyar su ta zuwa Abuja inda daga nan za a basu fasfo na fita kasar Scotland.
Sakatariyar tace ‘yan Koroso sune ja gaba a fannin raya al’adun gargajiya na kabilar Hausa/Fulani wanda hakan ya basu daman samun lambobin yabo masu yawan gaske a fadin duniya tana mai cewa wannan ne ma ya sa aka gayyacesu zuwa bukin al’adun gargajiya da za ayi a kasar Scotland.
Hajiya Hafsat ta kara da cewa ‘yan Koroson sun samarwa jihar Kano kima a bangaren raya al’adun gargajiya tare da nishadantar da jama’a ta wannan fannin.
Ta ja hankulan su da cewa, su kasance wakilan jihar Kano na gari sannan kuma suyi iyaka kokarin su wajen ganin sun ciyo wa jihar, manyan lambobin yabo da za’a baiwa wadan da sukayi fice a wasannin.
