Rahotanni na nuni da cewa Iker Casillas ya sanar da yin ritayarsa daga kwallon kafa.
A bara, Casillas ya kamu da bugun zuciya yayin daukar horo tare da kungiyarsa ta Porto, kuma bai buga wani wasa ba tun daga lokacin.
Mai tsaron ragar ya tabbatar da ritayarsa daga kwallon kafa a shafukan sada zumunta a yau Talata 4 ga watan Augustan 2020.
Casillas ya bugawa kasarsa ta Sipaniya wasanni 167, kuma ya lashewa kasarsa gasar cin kofin duniya a shekarar 2010 da kuma kofin kasashen Turai da 2008 da 2012.
Iker Casillas ya fara buga Tamaula a karamar makarantar matasan ‘yan wasa na Real Madrid kuma ya ci gaba da aikinsa a nan har ya koma Porto a watan Yulin 2015.
Shi ne kuma dan wasan Real Madrid na biyu da ya fi buga wasanni, inda ya buga wasanni 725 tsakanin 1999 da 2015, ya lashe kofunan La Liga biyar da kuma na Zakarun Turai uku tare da kungiyar.
