Wani Kwararren likitan ido, Dakta Adeniyi Irefin, ya ce ciwon suga na kara yiwuwar kamuwa da ciwon ido wanda na iya haifar da makanta, idan ba a kula ba.
Dakta Irefin, wanda ma’aikaci ne a Asibitin Ido na SeeWell dake Ibadan, ya bayyana hakan ne yayin da yake zantawa da ‘yan jarida ranar Asabar a Ibadan fadar jihar Oyo.
Ya ce, “Matsalar gani tare da masu ciwon suga babban matsalace da ya kamata a maganceta”.
Likitan ya bayyana wasu dalilan da suke haifar da ciwon ido ga masu fama da ciwon suga, inda ya ce: amfani da suga ba tare da kula ba, hawan jini, yawan cin maiko da kuma shan sigari.
