Mataimakin gwamnan jihar Bauchi Bala Tela, wanda shi ne shugaban kwamitin yaki da cutar Corona a jihar ya kamu da cutar bayan da aka yi masa gwaji.
Mai baiwa gwamna shawara akan kafar yada labarai Mukhtar Gidado, a cikin wani jawabi da ya fitar ya tabbatar da cewa Mataimakin gwamnan ya kamu da cutar bayan da cibiyar dakile cututtuka ta kasa ta fitar da sakamakon gwajin da aka masa.
“Ya kamu da cutar ne a yayin da yake kan aikinsa na yaki da cutar a jihar nan”. Cewar Gidado.
A cikin jawabin an bayyana Mataimakin gwamnan an killace a wajen killace masu cutar na jihar, kuma masana kiwon lafiya na ci gaba da kula da shi.
An kuma dauki samfurin wanda ya hulda dasu domin yin gwaji da nufin dakile cutar
Gwamna Bala Mohammed wanda ya kamu da cutar a baya yayi addu’ar warkewa da fatan alheri ga mataimakin nasa.
Gwamnan ya kara kira ga jama’ar jihar da su ci gaba da bin dokokin da masana suka shimfida don ganin an kawo karshen wannan annoba.
