Wani dan jarida mazaunin garin Jos, Samson Omale ya shirya wani taron yini daya inda ya horar da abokan aikinshi 150 a kan aikin jarida a zamanance a garin na Jos.
Da yake magana a wajen taron a ranar Litinin, Omale wanda ma’aikaci ne a kamfanin Silverbird ya ce a yi haka ne saboda ya koyar da abokan aikinshi koyon aikin jaridar zamani. Ya kuma kara da cewa taron kyauta ne, kuma ya yi haka ne sakamakon soyayyar da yake yi wa aikin jarida.
Ya ce shi ma ya mori irin wadannan tarukan a cikin gida Nijeriya da kuma kasashen waje, shi yasa ya ga akwai bukatar ya koyar da wasu.
“Aikin jaridar zamani shi ne abin da ake yayi yanzu, ya mamaye ko ina a duniyar aikin jarida.
“Amma abin takaici, da yawan abokan aikinmu basu da sanin haka. Kuma basu san ya za a yi su sani ba. Wasu ne suka horar damu; saboda soyayya ta da aikin sai na shirya wannan taron a matsayin wata hanya na bada nawa gudumawar da tsarin da ya horar dani,”inji shi.
Omale ya ce kudin da ya kasha wajen shirya taron daga aljihunshi ya samar, sannan kuma da wasu kudade da matarshi ta taimaka mishi dasu. “Babu wanda ya bani ko sisi na wannan aikin. Kudina ne da kuma taimakon matata,” a cewarshi.
Ya kuma yi kira da sauran ‘yan jarida da su nemi hanyar bada tasu gudumawar ta hanyar horar da ‘yan jarida masu tasowa akan sababbin abubuwa a fagen na aikin jarida.
