Hukumar hana Fasa-ƙwauri ta ƙasa reshen jihohin Kano da Jigawa ta kama mutum 15 bisa zargin fasa-ƙwaurin kaya da darajarsu ta kai kusan Naira miliyan 80.
Kayan waɗanda suka haɗa da tireloli guda huɗu ɗauke da buhunan gurbataccen takin zamani 1,842, buhunan shinkafa 1,608, jarkokin mai 567, buhuna 113 na suga, kulli 278 na tabar wiwi, sai kuma diloli 20 na kayan gwanjo da kekunan hawa guda 20.
Da yake bajekolin kayayyakin a ranar Talata a Kano, Kwanturolan hukumar a shiyyar, Ahmad Nasiru ya ce tuni aka bayar da belin waɗanda ake zargin yayin da bincike ke ci gaba da wakana.
https://dimokuradiyya.com.ng/kwastam-ta-cafke-shinkafa-na-biliyoyin-nairori/
Kwanturolan ya ce sun ƙwace kayan ne cikin watanni biyun da su gabata, yana mai bayyana masu Fasa-ƙwaurin a matsayin masu yin zagon ƙasa ga ci gaban tattalin arziƙin ƙasa.
Ya kuma yi kira ga ‘yan Najeriya da su ci gaba da bawa hukumar tasu haɗin kai wajen ganin an kakkaɓe masu ire-iren waɗannan laifuka.
“Ina kira ga jama’a da su ci gaba da ba mu muhimman bayanai cikin sirri da za su taimaka wajen ganin an kawo ƙarshen ayyukan masu Fasa-ƙwaurin,” inji kwaturolan.