A karon farko cikin shekaru hudu Gwamna Abdulrahman Abdulrazaq na jihar Kwara da tsohon shugaban majalisar dattawa Abubakar Bukola Saraki sun yi musabaha a filin sallar idi na Ilorin.
Da yawa daga cikin masu ibada sun yi mamaki lokacin da gwamnan ya je wurin Saraki ya mika hannunsa.
Tsohon mai matsayi na uku a kasar nan ya mayar da martani kuma dukkan mutanen sun yi musanyar gaisuwa.
Da gwamna ya isa filin sallah, kai tsaye ya nufi sashin da aka tanadar masa ya zauna.
Jim kadan ya mike tsaye ya nufi inda Saraki yake zaune ya gaishe shi, suka yi musabaha.
Hakan ya jawo tsawa daga masu ibada a sashe na musamman VIP, inda suka tashi tsaye domin su hango shugabannin siyasa.
Daga nan sai gwamnan ya yi gaba da gaisawa da sauran shugabanni, musamman tsohon shugaban jam’iyyar PDP na kasa, Alhaji Abubakar Kawu Baraje, aminin Saraki.
Sauran wadanda suka halarci filin Sallar Idi sun hada da tsohon Alkalin Alkalan Najeriya, Mai Shari’a Moddibo Alfa Belgore.
Bayan wannan tataburzan, daya daga cikin ’yan kwamitin shirya taron a filin idin ya yaba wa gwamnan bisa nuna iya jagoranci.l na gari
Saraki, wanda shi ne Wazirin Ilorin, ya iso filin sallah tun da farko tare da mukarrabansa da sauran manyan baki.
Saraki da Abdulrazaq, wadanda suke jam’iyyu daban-daban, sun yi ta fafatawa a shekarun baya.