Gwamnatin Tarayya ta fara shirin kaɗawa kadarorin wasu yan siyasar kasar ƙararrawa domin Gwanjon su, bayan da aka zarge su da aikata sama da fadi kan dukiyar al’ummar kasar.
Gwamnatin ta kuma fara ne da kadarorin tsohuwar ministar albarkatun man-fetur ta kasa Diezani Alison Madueke, da kuma tsohon shugaban dakarun tsaron Nigeria, Air Chief Marshal Alex Badeh.
Diezani dai tana da wasu kadarori na gidaje na alfarma a yankin banana Island, dake jihar Legas, yayin da kuma Alex yake da kadarorin a yankin Wuse 2 da Maitama baki dayan su a babban birnin tarayya Abuja, kuma tuni gwamnati ta kwace su.
Baya ga haka gwamnatin Tarayya ta kuma yi nasarar kwato tarin wasu kadarori daga wajen mutanen da suka haɗar da kayayyakin sawa dana kwalliya da ƙawa.
Tuni dai an fara yiwa kayayyakin ƙima, da nufin sallamar dasu ga masu bukata kasancewar an samu damar mallakar kayan ne ta hanyar da bata dace ba.
Jaridar Dimokuraɗiyya ta rawaito cewa, ko da watan Mayu, shugaban Hukumar yaki da cin hanci da rashawa EFCC yayin da ya bayyana gaban zauren Majalisar, ya bayyana cewa iya Sarƙoƙi da yan kunne, hadi da awarwaro da suka kwato a wajen Diezani darajar kudin ya haura Naira biliyan 14.
