A ranar Litinin gwamnatin jihar Yobe ta tallafawa jami’an ‘yan sanda da sauran rassan hukumomin tsaro da motoci 30 kirar Toyota Hilux wanda gwamnatin ta siye su akan Naira miliyan 720.
Gwamna Mai Mala Buni, shi ne ya mika wa Sufeto Janar na ‘yan Sandan Nijeriya, Mohammed Adamu motocin a garin Damaturu, inda gwamnan ya ce jihar Yobe za ta samu ci gaba ne a bangaren tattalin arziki da zamantakewa kawai idan tsaro ya inganta a jihar.
Ya ce bisa wannan dalilin ne ma ya sanya suka yi tunanin ya zama wajibi su yi aiki tare da jami’an ‘yan sandan domin samar da runduna ta musamman da za su rika kawo daukin gaggawa a yayin da ake fuskantar wata barazanar tsaro a jihar.
Gwamnan ya ce za su sanya wa wannan rundunar suna da ‘Haba Maza’ ga jami’ai na musamman na ‘yan sandan domin ba su bai wa dukkanin wani batagari dama ba a fadin jihar. Ya ce wannan rundunar ta ‘Haba Maza’ za ta rika zagaya wa jihar domin tabbatar da tsaro tare da bankado bata gari a jihar.
Sannan har wala yau, gwamnatin jihar ta mika wani kataren gini domin ya zama babban hedikwatar rundunar ‘Haba Maza’. Gwamnan ya shawarci shugaban ‘yan sandan da su samar da wadansu tasoshin ‘yan sandan domin ganin an kawo yawan jami’an ‘yan sanda a jihar don tabbatar da tsaro da samar da zaman lafiya.
Sufeto Janar na ‘yan sandan ya jinjinawa Gwamna Mai Mala Buni bisa wannan hobbasar na sa da kuma gudummawar da ya bai wa ‘yan sanda domin ganin sun gudanar da ayyukansu.