Shugaban hukumar shige da fice ta ƙasa (NIS) Muhammad Babandede, ya bi sahun ɗaruruwan jami’an hukumar masu ci da waɗanda su ka yi ritaya da su ka fito daga masarautar Rano ta jihar Kano wajen karrama sabon sarki, Alhaji Kabir Muhammad Inuwa.
RELATED POSTS
Bikin karramawar wanda ya gudana a fadar sarkin na Rano ranar Asabar ya kuma sami halartar tsohon mai riƙon muƙamin shugaban hukumar na ƙasa wanda kuma yanzu haka ɗaya ne daga cikin dagattan masarautar kuma sarkin Kibiya, Alhaji Usman Umar Kibiya.
Sarkin na Rano dai wanda tsohon ma’aikacin hukumar ta shige da fice ne ya zama sarki a masarautar bayan rasuwar tsohon sarki, Alhaji Tafida Abubakar Ila.
Masarautar Rano dai na ɗaya daga cikin waɗanda gwamnan jihar Kano Abdullahi Umar Ganduje ya daga likafarsu kuma garin na da daɗaɗɗen tarihi kasancewarsa ɗaya daga cikin garuruwan Hausa bakwai.
Da ya ke jawabi yayin bikin, shugaban hukamar NIS Babandede ya bayyana sarkin a matsayin mai sauƙin kai, rungumar jama’a wanda kuma har yanzu ya ke ci gaba da mu’amala da hukumar har bayan ritayarsa.
“A gurina, wannan ziyarar ’yar gida ce. A matsayina na shugaban wannan hukumar, abin alfaharina ne ganin ɗaya daga cikin tsoffin ma’aikatanmu na riƙe da wannan muhimmin matsayin, saboda haka na zo taya ku murna,” inji Babandede.
http://dimokuradiyya.com.ng/yadda-gwamna-ganduje-ya-nada-sabon-sarkin-rano/
Ya ƙara da cewa, “Na zo nan ne ba wai kawai a matsayin shugaban wannan hukumar ba, sai don ina ganin kaina a matsayin ɗan wannan masarautar saboda dalilai da dama.”
“Na farko dai a garin Rano na yi makarantar sakandire, mutumin da ya taimaka min na sami aiki a wannan hukumar (sarkin Kibiya mai ci) ɗan wannan masarautar ne, sannan kuma babban abin sha’awar shi ne matata ma ‘yar nan ce.
“Saboda haka ina da alaƙa mai ƙarfi da wannan masarautar. Ni da sarki aminai ne sosai kuma mun jima tare tun yana Kaigaman Rano Hakimin Kibiya.”
“Ina yi wa Allah godiya tare da taya wannan masarautar murnar samun sarki mai sauƙin kai da kuma kishin al’ummarsa,” inji Babandede.
Shugaban hukumar ya kuma yabawa masu shirya taron tare da shawartar ragowar jami’an hukumar kan su yi koyi da sarkin.
