Hukumar ‘Yan sanda a jihar Benue sun kama wasu da ake zargin ‘yan kungiyar asiri ne har mutane 60 cikin sati daya a wurare daban-daban na garin Makurdi, babban birnin Jihar ta Benue.
Kakakin Rundunar ‘Yan Sandan Jihar, DSP Catherine Anene, ta ce a kokarin rundunar na dakile matsalolin tsaro a fadin Jihar ne ta kai farmaki a kan kungiyoyin asiri bayan samun bayanan sirri da ke alakanta su da munanan laifuka a Jihar.
“A saumamen da muka kai cikin sati daya, mun kama ‘yan kungiyar asiri 60 da bidigogi 4 da gatari 5 da hulunan beret bakake 3 da jajaye 2 sai kakin soja 1 da kuma rigar sulke 1”, kamar yadda ta bayyana.
Anene ta ƙara da cewa mutum takwas daga cikin waɗanda ake zargi ‘yan ƙungiyar asiri ne an kama su ne a wani ɓangare cikin garin Makurɗi, ranar 14 ga watan Yuni, 2020.
Ta ce bayan kwana daya sun kama wani da aka fi sani da “Smooky of North-Bank” tare da wasu mutum 17 kusa da North bank, sai kuma wani gungun mutum biyar a cikin garin, baya ga wasu kame da suka yi.
Hukumar ‘yan sandan jihar ta kara kira ga iyaye da su sa ido kan mu’amular da ‘ya’yansu suke yi domin rage matsalolin yawan shiga kungiyar asiri a Jihar.