Kungiyar dillalan man fetur mai zaman kanta ta kasa, (IPMAN) ta yi barazanar rage wadatar da man fetur a jihohin Borno da Yobe saboda gazawar gwamnatin tarayya na biyan basussukan Naira Billiyan 6, da kungiyar ke bi.
Hakan dai na zuwa ne bayan shafe watanni 10 da fita cikin kangin da Maiduguri da kewayeta suka shiga, sakamakon rikicin Boko Haram wanda ya yi illa ga harkokin zamantakewa da tattalin arziki a jihar.
A cikin sanarwar da ta kungiyar ta fitar kuma aka karanta a karshen taron masu ruwa da tsakin ta a Maiduguri, Shugaban kungiyar IPMAN na jihar Borno, Alhaji Mohammed Kuluwu, ya ce kasa da kashi 10 na mambobinsu ne ke gudanar da ayyukansu saboda basussukan.
Kuluwu ya yi nuni da cewa, kamata ya yi gwamnatin tarayya ta yi la’akari da ’yan kasuwan da suka fito daga jihohin biyu saboda irin rashin tsaro da suke da shi.
KARANTA WANNAN LABARIN: Yan bindiga sun Kashe Gwamnan Mutane Tare da Kona Gidaje da dama
“Ba mu da wani zabi da ya wuce mu nemi mambobinmu da su zauna a gida saboda rashin biyansu albashi na watanni bakwai na Naira biliyan 6 a jihar Borno kadai, da asusun daidaita farashin man fetur (PEF) ke bin su.
“Idan gwamnati ta ki biyan mu, ba mu da wani zabi da ya wuce mu dakatar da ayyukan mu” kamar yadda Kuluwu ya gargadi Gwamnatin Tarayya.
A wani Labarin Kuma na daban.
Rikicin ya barke tsakanin magoya bayan tsohon gwamnan jihar Gombe, Danjuma Goje, da gwamna mai ci, Inuwa Yahaya, a ranar Juma’a, rahotanni sun nuna cewa, an yi artabu daya yi sanadiyar mutuwar mutane biyar, tare da jikkata wasu da dama.sai dai an gano cewa an lalata motoci da dama sakamakon barkewar rikicin.
Goje, wanda a halin yanzu yake wakiltar mazabar Gombe ta tsakiya a majalisar dokokin kasar, ya yi zargin a wata sanarwa da mai taimaka masa kan harkokin yada labarai, Lilian Nworie, ya fitar ranar Juma’a, cewa rikicin ya faro ne a lokacin da ma’aikacin gidan Yahaya ya kai wa ayarin sa hari.
Nworie yace shugaban nasa yana kan hanyarsa ta zuwa halartar daurin auren jikarsa, Fatima Musa a garin Gombe,a ranar Juma’a, yayin da mutanen Yahaya suka yi wa ayarin motocinsa barna.
Nworie ya kara da cewa, “Tafiyar Sanata mai girma ta kasance cikin kwanciyar hankali har sai da hadiman gwamnan da suka hada da mataimakinsa da direban sa suka tare hanya na tsawon Sa’o’i biyu inda suka farmaki Sanata Goje da wadanda ke cikin ayarin sa.“Abin takaici ne yadda aka yi asarar rai guda tare da lalata motoci da dama, ciki har da motar Sanatan. Sun farfasa gilashin ta.
“Duk kokarin da mai taimaka wa gwamnan yayi na kawar da shingen bai haifar da wani sakamako ba domin ya dage cewa ya samu umarni daga sama cewa kada a bari tsohon gwamnan ya shiga garin.” Sai dai kuma da yake kare gwamnan, kwamishinan yada labarai da al’adu na jihar Gombe, Julius Lepes, ya zargi Goje da shigo da ‘yan daba cikin babban birnin jihar.
Kwamishinan ya yi zargin cewa Goje, “a halinsa ne ya yanke shawarar tara ‘yan daba daga kananan hukumomi daban-daban dauke da makamai wajen zuwa raka shi daga filin jirgin sama zuwa cikin babban birnin jihar saboda wasu dalilai da suka fi sani da shi.
Jaridar Dimokuradiyya ta rawaito cewa Kwamishinan yace, “A lokacin bikin Sallah babba data gabata, shi ma ya dauki nauyin wasu ‘yan daba wadanda suka kai farmaki, inda suka yi asarar rayuka biyu.“Har ila yau, a makon daya gabata a cikin garin Deba dake karamar hukumar Yamaltu Deba irin wannan yanayin ya faru a misalin Sanatan.
