Rundunar ‘yan sandan jihar Legas ta tabbatar da cafke wani sojan bogi mai suna Samuel Msughter a kewayen hanyar Epe zuwa Ijebu a jihar.
Jami’in hulda da jama’a na rundunar ‘yan sandan jihar, Benjamin Hundeyin, ne ya tabbatar da faruwar lamarin a ranar Juma’a.
Ya ce wanda ake zargin ya kware wajen raka kaya sanye da kayan sojoji, inda ya kara da cewa an fara bincike don gano girman laifin da ya aikata.
Ya ce, “Rundunar ‘yan sandan jihar Legas ta kama wani sojan jabu mai suna Samuel Msughter mai shekaru 28 a hanyar Epe zuwa Ijebu. Wanda ake zargin ya kware wajen raka kaya sanye da cikakkun kakin sojoji.
“Ana ci gaba da gudanar da bincike domin gano cikakken laifin da ya aikata, musamman da kayan sawa. Za a gurfanar da wanda ake zargin a kotu da zaran an kammala binciken.”
A wani labarin Kuma na daban.
Dan takarar shugaban kasa a jam’iyyar PDP, Atiku Abubakar, a ranar Juma’a, ya bayyana babban kalubalen da jam’iyyar APC ta haddasa a Najeriya.
Atiku ya ce jam’iyyar APC ta jawo wa Najeriya rarrabuwar kawuna ne kawai.
Tsohon Mataimakin Shugaban kasar ya koka da yadda Najeriya ta fi rabuwa a karkashin gwamnatin APC fiye da lokacin yakin basasa.
Atiku ya yi wannan maganar ne a Legas a taron ‘ya’yan jam’iyyar PDP gabanin gudanar da zaben fidda gwani da za a yi.
A cewar Atiku: “Muna raye kan kalubalen da jam’iyyar APC ta jawo mana a kasar nan.
“Babban kalubalen da jam’iyyar APC ta kawo shi ne rashin hadin kai. Ba a raba mu haka a baya ko a lokacin yakin ba.
“Muna da alhakin korar jam’iyyar amma dole ne mu hada kanmu domin mu iya yin hakan, jam’iyyar PDP ta Legas ta rabu shekaru da dama, ina kira ga PDP ta Legas da ta kawo hadin kai a jam’iyyar, ina kira ga manya. don Allah a tabbatar da hadin kai a jam’iyyar reshen jihar Legas domin mu karbi ragamar mulkin jihar.
“Ina fatan yin aiki tare da ku don mayar da PDP jihar Legas. Ba ma son Legas ta kasance ƙarƙashin iyali ɗaya. Muna son Legas ta zama ta ’yan Legas.
Kazalika ya kamata mu guji yin irin kuskuren da muka yi tsawon shekaru. Zan ci gaba da yin aiki tare da ku har sai mun cimma nasara.”