Sanata Shehu Sani ya yi tir hadi da Sukar hukumar PPPRA wanda ta dauka na yin ƙarin farashin fetur. Tsohon Sanatan na Jihar Kaduna ya ce mutane su na fama a wannan lokaci
Shehu Sani ya zargi Gwamnati da nuna rashin imani da ma rashin tausayi, A cikin tsakiyar makon nan ne gwamnatin tarayya ta bada sanarwar da bata yi wa mutane da-dama dadi ba, na cewa an samu canji a farashin litar man fetur.
Hukumar PPPRA mai kula da farashin kayan mai a Najeriya ta bada shawarar a ƙara kuɗin litar man fetur zuwa tsakanin N140.8 da kuma N143.8 a watan Yuli. Ganin yadda man fetur ya yi tsada a halin yanzu, mutane sun fito su na kokawa da wannan mataki da gwamnati ta ɗauka bayan ɗanyen mai ya fara daraja a kasuwa.
Sani ya soki wannan ƙari ne a shafinsa na Twitter, hakan ya jawo wasu sun fito sun nuna goyon bayansu da ƙarin, yayin da wasu kuma su ke sukar lamarin.
Fitaccen ɗan siyasar ya rubuta: “Ƙarin da hukumar PPPRA na kasa ta yi a kan farashin kayan mai abin ayi Allah-wadai ne, babu tausayi…”
Kwamred Shehu Sani ya cigaba da cewa: “…Kuma ba a nuna imani ba ganin irin wahalar da mutane su ke ciki a watanni biyar ɗinnan da su ka shuɗe.”
Shehu Sani ɗan gwagwarmaya ne wanda ya saba fafatuka wajen kare haƙƙin Talakawa da marasa ƙarfi a Najeriya, musamman kafin ya shiga harkar siyasa gadan-gadan.
A watanni biyar da su ka wuce, gwamnati ta ƙara haraji, sannan an rufe wuraren aiki da kasuwanci a jihohi a dalilin annobar COVID-19 da ta barke a kasashen Duniya.