Kotu ta yanke tsohon shugaban kwamitin gyaran Fansho na Nigeria Abdulrasheed Maina, hukuncin daurin shekaru 61 a gidan gyaran hali da tarbiyya.
Mai shari’a Okon Abang na babbar kotun tarayya da ke Abuja ne ya jagoranci yankewa Maina hukunci zaman gidan gyaran hali da tarbiyya a yau Litinin.
Alkalin kotun ya samu Maina da laifin satar Naira biliyan 2 da aka ware wa ‘yan fansho, inda mai shari’ar ya nuna takaicin yadda ‘yan fansho da dama suka mutu saboda wahala.
An kuma sami Maina da laifin boye gaskiyar sa a kan wasu asusu da aka bude a bankunan UBA da Fidelity, a matsayin mallakinsa amma ya ƙeƙashe ƙasa wajen cewa hakan ba gaskiya bane.
An ce ya yi amfani da bayanan danginsa ba tare da saninsu ba, wajen mayar da dukiyar mallakinsa.
Asusun dai na da tsabar kudi naira miliyan 300, miliyan 500, da kuma naira biliyan 1.5.
Kotun ta kara da cewa Maina ba zai iya tabbatar da cewa kudaden dake cikin asusun ba satar su yayi ba.
Mai shari’a Abang ya kuma ce ta hanyar hidimar Maina a matsayin ma’aikacin gwamnati, albashi da alawus dinsa ba za su kai kudaden da ke cikin wadannan asusun ba.
Ya kuma samu Maina da laifin siyan kadarori a Abuja, da tsabar kudi da suka kai dala miliyan 1.4, wanda ya haura ka’ida ta Naira miliyan 5 ba tare da wucewa ta wata cibiyar hada-hadar kudi ba.