Majalisar dokokin jihar Kano ta amince da ƙudurin dokar masarautu ta 2020, da ta samar da ƙarin sarakunan yanka huɗu a jihar.
Zaman majalisar da shugabanta, Abdulazeez Gafasa ya jagoranta ya amince da sauye-sauyen da aka yi wa dokar masarautun da ya ƙara yawan sarankunan yankan jihar daga ɗaya zuwa biyar.
Majalisar ta amince da kafa sabbin masarautun huɗu a jihar da suka haɗa da Gaya, Karaye, Rano da Bichi, baya ga masarautar Kano da a baya ita ce kaɗai a faɗin jihar.
Shugaban masu rinjaye na majalisar, Kabiru Dashi ya ce gyaran fuskar da aka yi wa dokar ta tanadi cewa Sarkin Kano ne zai zama Shugaba majalisar sarakunan jihar Kano, wanda ya kawo ƙarshen ce-ce-ku-ce game da batun karɓa-karɓar shugabancin majalisar Sarakunan.
“Sabuwar dokar ta ƙara yawan masu zaɓen sarki daga huɗu zuwa biyar domin bayar da damar zabe na adalci a duk sadda buƙatar zaɓen sabon sarki ta taso.
“Ƙara yawan masu zaɓar sarki zuwa mutum biyar na nufin za a samu adalci a zaɓen. Sabuwar dokar ta kuma ƙayyade kwana uku a matsayin wa’adin zaɓen sabon sarki”, kamar yadda ya bayyana.