Fitaccen dan wasan Barcelona Lionel Messi ya kafa sabon tarihi a gasar La Liga ta Sipaniya, a matsayin wanda ya fi kowa zura kwallo a kakar wasa ta bana, bayan da ya zura kwallo biyu a wasan karshe na kungiyar Barcelona a gasar a ranar Lahadi.
Barcelona ta kawo karshen kakar wasa ta 2019/2020 da lallasa Alaves da ci 5 da 1. Barca ta kammala kakar wasa ta bana a matsayin na biyu da maki 82, inda Real Madrid ta lashe gasar da maki 87 bayan ta tashi 2 da 2 a wasan karshe su da Leganes.
Alaves sun kare a na 16 da maki 39. Ansu Fati shi ya fara zura kwallon farko, inda kuma Messi da kuma Luiz Suarez suka zura na su kwallon, a yayin da dan wasan bayan kungiyar Nelson Semedo ya zura ta hudu, sai Messi ya zura ta biyar. Inda ya kammala kakar wasa ta bana da kwallo 25.
Messi ya bai wa Karim Benzema na Real Madrid tazarar kwallo hudu. Messi ya fi kowa cin kwallo a La Liga sau hudu a jere, wanda wannan ya sanya ya kafa sabon tarihin zarce Marigayi Telmo Zarra, sai dai Messi ya ce ya so a ce sune suka lashe gasar La Liga din.
