By Abbas Yakubu Yaura
Mutane uku ne suka mutu a wani mummunan hatsarin mota da ya afku a babbar hanyar Ilorin zuwa Jebba a jihar Kwara a yammacin ranar Alhamis.
Hatsarin daya afku a cewar hukumar kiyaye haddura ta kasa, ya rutsa da motoci biyu da suka hada da tirela mai lamba T0431KT da wata mota kirar Toyota Corolla mai lamba AFN 274 NY.
Kwamandan hukumar FRSC reshen jihar Kwara, Mista Jonathan Owoade, wanda ya tabbatar da faruwar lamarin yace lamarin ya faru ne da misalin karfe 6:10 na yamma a Olokonla kusa da mahadar Shao a karamar hukumar Moro ta jihar Kwara.
Jaridar Dimokuradiyya ta rawaito cewa hatsarin ya faru ne sakamakon gudun wuce sa’a da kuma wuce gona da iri da ake zargin direbobin ke yi yayin gudanar da tuki.
Sannan Owoade yace mutane bakwai Maza biyar da mata biyu ne hatsarin ya rutsa dasu ya kara da cewa yayin da hudu daga cikinsu suka samu raunuka daban-daban, wasu uku kuma namiji daya da mata biyu sun rasa rayukansu.
Ya kara da cewa an kai wadanda suka jikkata zuwa wani asibiti mai zaman kansa na Batholomew, domin yi masu magani yayin da aka ajiye gawarwakin wadanda suka mutu a dakin ajiye gawa na asibitin koyarwa na Jami’ar Ilorin domin a tantance su.
Kazalika Owoade ya shawarci direbobi dasu kiyaye ka’idojin hanya a kodayaushe kuma su bi ka’idojin gudu yayin da suke tafiya a kan babbar hanyar.
Comments 1