Duk da kasancewar Nijeriya kasa ta 1 a wajen samar da wake a duk Duniyar nan, Nijeriya in takan kashe Naira bilyan 16 a duk shekara wajen shigo da waken daga kasashen waje makwabtanta, kamar yanda gwamnatin tarayya ta shelanta. Da yake magana a wani taron bita da aka shiryawa manema labarai a kan noman zamani a Afrika, a Abuja, ranar Alhamis, babban Sakatare a ma’aikatar kimiyya da fasaha, Mista Bitrus Bako, cewa ya yi, yanayin da aka samar a kwanan nan a kan auren wake zai taimaka wajen cike gibin da ke akwai a wajen samar da waken. Bako, wanda darakta a kan ayyuka na musamman na ma’aikatar, Mista James Sule, ya wakilce shi, ya bayar da tabbacin wannan ingantaccen waken da ake sa ran a soma yin amfani da shi a shekarar 2020, yana da inganci, lafiya da amfanarwa a jiki, sannan kuma ba shi da wata illa, kwari kuma ba sa cinsa. Za ku yi mamakin sanin cewa, Nijeriya ce kasa ta gaba a wajen samar da wake a duk Duniyar nan, amma duk da hakan, ba ta iya noma waken da zai wadace ta da kusan tan rabin milyan, hakan ya sanya tilas muke shigowa da waken daga kasashe makwabtanmu, kamar su Kamaru da Burkina Faso, wanda kuin shi ya kai kusan milyan 16 a duk shekara. Babban sakataren ya bayyana tabbacin da yake da shi na cewa, amincewar da aka yi na kwana-kwanan nan, akan yin auren auduga, zai samar da gagarumin canji a sashen noma na kasan nan. Ya ce, koma-bayan da aka samu a wajen samar da auduga a cikin kasar nan ya yi illa a kamfanonin masaku na kasar nan, wanda hakan ya dankwafe kamfanonin auduga da duk harkokin da suka shafe shi.