Kungiyar PSG dake kasar Faransa ta lallasa Real Madrid da ci 3 da 0 a gasra Zakarun Turai da ya gudana a daren jiya Laraba. Real Madrid ba ta ji da dadi ba a wasan farko na gasar Zakarun Turai bayan Angel Di Maria ya zura mata kwallo har biyu a filin wasa na Parc des Princes na birnin Paris din kasar Faransa.
Tsohon dan wasan na Real Madrid ya fara cilla kwallo a ragar Thibaut Courtois a minti na 14 bayan Bernet ya koro masa kwallo cikin yadi na 18.
Sai a minti na 33 Di Maria ya kara ta biyu ta hannun Idrissa Gueye, kafin Thomas Meunier ya kara ta uku a mintin karshe na wasan.
Real Madrid ba ta kai hari kai tsaye ga ragar PSG ba a baki dayan wasan wato short on target, wanda rabon da hakan ta faru a gasar tun kakar shekarar 2003-2004.
Wannan shi ne wasa na farko da aka cinye Madrid a kakar bana, inda ta yi canjaras 2 ta kuma ci biyu a Laligar Sifaniya.
Wannan na zuwa ne yayin da makomar mai horas da kungiyar Zinedine Zidane ke fuskantar barazana a Bernabeu. Kuma tuni rahotanni suka fara nuna cewa Jose Mourinho zai iya maye gurbin Zidane.
