By Abbas Yakubu Yaura
Rundunar ‘yan sandan jihar Ribas tace jami’anta sun kama wani limamin cocin sabuwar zamani mai suna Onyebuchi Amadi wanda ake zargin ya shake matarsa wanda ta mutu har lahira a wata gardama data afku a tsakanin su a garin Aluu dake karamar hukumar Ikwere a jihar.
Jami’in hulda da jama’a na rundunar ‘yan sandan jihar, Nnamdi Omoni, ya tabbatarwa da wakilinmu ta wayar tarho a ranar Alhamis.
Yace an dauko gawar marigayiyar daga inda aka aikata laifin kuma an ajiye ta a dakin ajiyar gawa.sai dai Omoni yace an mika wanda ake zargin zuwa sashin binciken manyan laifuka na jihar bisa umarnin kwamishinan ‘yan sanda, Friday Eboka.
Jaridar Dimokuradiyya ta rawaito cewa, Amadi ya shake matar tasa, mai suna Solution, wacce kuma limamin cocin ce.Sa dai kuma an bayyana cewa ya kulle ta ne ya gudu daga unguwar bayan ya gane cewa ta mutu.
Kakakin rundunar ‘yan sandan jihar yace, ” Ina mai tabbatar da kama wani Onyebuchi Amadi daya samu rashin fahimta da matarsa a ranar 8 ga watan Nuwamba.
“An yi zargin cewa shi (Onyebuchi Amadi) ya shake ta har lahira. Izuwa yanzu dai mun dauke gawar matar tare da kai ta dakin ajiyar gawa.
“Kwamishinan ‘yan sandan jihar ya bayar da umarnin a mika wanda ake zargin zuwa CID na jihar domin ci gaba da bincike.”
