Tsohon dan wasan kungiyar kwallon kafa ta Manchester United da Eberton, Wayne Rooney, ya bayyana aniyarsa ta zama daya daga cikin masu koyar da Manchester United nan gaba idan yayi ritaya daga buga kwallo. Rooney, wanda yafi kowanne dan wasa zura kwallo a raga a Manchester United ya buga wasanni 559 sannan kuma ya zura kwallaye 253 tun bayan daya koma kungiyar daga Eberton a shekara ta 2004 inda kuma yabar kungiyar a shekara ta 2017. Kawo yanzu dan wasan yana bugawa kungiyar kwallon kafa ta DC United dake kasar Amurka wasa kuma kwantiraginsa da kungiyar zai kare ne a shekara ta 2020 amma kuma tuni yafara shirye shiryen zama mai koyarwa. ”Tuni Rooney yafara shirye shiryen yadda zai cigaba da rayuwarsa idan yayi ritaya kuma yanason yaga ya koma gida domin cigaba da kukawa da matarsa mai suna Coleen da kuma ‘ya’yansa” in ji wani makusancin Roooney Ya cigaba da cewa “Saboda haka aiki a tsohuwar kungiyarsa ta Manchester United zaiyi masa dadi domin yanason ya zama shima mai koyarwa kuma yana fatan ganin ya taimakawa Solkjaer domin sake gina kungiyar” Kafin yabar Manchester United Rooney ya lashe kofuna 16 a rayuwarsa ciki har da gasar firimiya guda biyar da gasar cin kofin FA da gasar cin kofin zakarun turai guda daya a shekara ta 2008 sannan kuma ya kasance wanda yafi kowa zura kwallo a raga a cikin tawagar kasar Ingila.
