Tsohon shugaban kasar Peru, Alan Garcia ya dirkawa kansa bindiga a ka, lokacin da ‘yan sanda suka je kama shi a gidansa, saboda tuhumar da ake masa na cin hanci da rashawa.
Jam’iyyar (Apra ) ta tsohon shugaban, ta tabbatar da mutuwarsa a asibiti.
Ministan Lafiya na kasar, Zulema Tomas, ya ce, sau uku likitoci na farfado da Garcia bayan ya gamu da bugun-zuciya a daidai lokacin da ake yi masa tiyatar harbin bindigar, amma daga bisani ya sheka lahira; inji Rfi
Garcia da ya mulki Peru tsakanin shekarar 1985-1990 da kuma 2006-2011, na fuskantar tuhumar karbar cin hanci daga kamfanin gine-gine na Brazil, Odebretch , yayinda a cikin watan Nuwamba ya nemi mafakar siyasa a ofishin jakadancin Uruguay bayan kotu ta hana shi ficewa daga kasar har tsawon watanni 18.
Jami’an ‘yan sandan sun ziyarci gidansa ne bayan sammacin da suka samu na kama shi kan zargin almundahana, matakin da ka iya sa a tsare shi har tsawon kwanaki 10 domin kammala bincike a kansa.
Shugaban kasar Peru, Martin Vizcarra ya bayyana damuwarsa kan mutuwar Garcia tare da mika sakon ta’aziya ga iyalansa.