Shugaban kasa Buhari ya mika ta’aziyyarsa ga gwamnatin JIhar Kano da Masarautar Rano da Majalisar Sarakunan Kano bisa rasuwar Mai Martaba Sarkin Rano, Alhaji Tafida Abubakar Il.
Sarkin Rano ya rasu yana da shekara 74 bayan gajeruwar jinya da ya yi fama da ita a ranar Asabar.
Kakakin Masarautar Rano, Wali Ado ya ce Sarkin ya yi jinyar kwana biyar ne, inda aka kai shi asibiti ranar Juma’a.
Garba Shehu, Kakakin Shugaba Buhari ya fitar da sanarwar ta’aziyyar inda sanarwar ke cewa; abin takaici ne yadda mai martaba ya rasu a lokacin da gwamnati ke dogara kan Sarakunan gargajiya domin wayar da kan al’umma game da yadda za su tsira da rayuwarsu.
A karshe Buhari ya yi addu’ar Allah ya ji kansa.