By Abbas Yakubu Yaura
Sama da mata dubu uku na jam’iyyar PDP ne a jihar Kwara suka fice daga jam’iyyar adawa zuwa jam’iyyar (APC) mai mulki.
Masu sauya shekar wadanda akasari sun fito ne daga unguwar Ibagun dake karamar hukumar Ilorin ta Gabas a jihar, sun bayar da misali da yadda Gwamna AbdulRahman AbdulRazaq ya hada da mata da kuma fitowar Alhaja Falilat Mohammed a matsayin shugabar mata ta jam’iyyar APC ta jihar wanda hakan shine dalilin ficewarsu daga PDP.
Gwamna AbdulRazaq ne ya tarbi wadanda suka sauya sheka zuwa APC, wanda ya samu wakilcin mashawarcinsa na musamman kan harkokin siyasa, Alhaji Abdullateef Alakawa yayin da shugaban jam’iyyar, Prince Sunday Fagbemi, ya samu wakilcin sakataren jam’iyyar APC na jihar, Alhaji Mustapha Ishowo.
Wakilin gwamnan ya samu goyon bayan shugaban masu rinjaye a majalisar, Abubakar Olawoyin da sauran jiga-jigan jam’iyyar.
Da suke jawabi a madadin wadanda suka sauya sheka, Alhaja Balikis Abdulrauf da Fatima Tajudeen, sun bayyana cewa irin baiwar da gwamnan ya yi da kuma baiwa mata fifiko yasa suka koma jam’iyyar APC.
Sun yi la’akari da shirye-shiryen karfafa mata daban-daban da gwamnan ya aiwatar a cikin shekaru biyu da suka gabata tare da nada mata a cikin manyan ma’aikatun gwamnati, sun kara da cewa jihar Kwara ta fi yawan mata a matsayin mambobin majalisar ministocin kasar.
Matan, wadanda suka yi alkawarin ci gaba da marawa gwamnatin Gwamna AbdulRazaq baya, sun roke shi da ya amsa kiraye-kirayen da ake yi masa na neman tazarce a shekarar 2023 domin amfanin talakawan kasar, wadanda ke jin tasirin gwamnatinsa.
Kazalika Ita ma shugabar mata ta jam’iyyar APC a jihar, Alhaja Falilat Mohammed, ta godewa wadanda suka sauya sheka bisa yadda suka yaba da yadda Gwamna AbdulRazaq ya jajirce wajen tabbatar da walwala da jin dadin rayuwar mata a jihar.
Jaridar Dimokuradiyya ta rawaito cewa sama da mata 10,000 daga yankin Ibagun ne suka amfana da tsare-tsaren gwamnati daban-daban.
A nasa jawabin, wakilin gwamnan, Alhaji Alakawa, ya bada tabbacin cewa za a yi wa ‘ya’yan jam’iyyar APC da ke kan gaba ta gomashi.
