Sojojin Nijeriya a Ikeja dake jihar Legas a ranar asabar sun bayyanar da wani mutum mai suna Okafor Collins da wasu abubuwan da ake zargin hodar ibilis ne kulli sittin.
Sun ce sun kama dan shekara 30 din ne a hanyar 311 daura da gidan rawan Cincillati a garin Festac.
Kwamandar rundunar da suka cafke mutumin, Birgediya Janar Musa Etsu-Ndagi ne ya bayyana haka ga manema labarai a safiyar ranar Jumma’a.
Etsu-Ndagi ya ce bangaren Exercise Crocodile Smile ne suka kama mutumin, ya na mai cewa shirin yana haifar da da mai ido.
Ya ce, za su mika mutumin ga hukumar fada da miyagun kwayoyi, NDLEA, don su ci gaba da bincikenshi.
“Idan ba a manta ba, Hafsan Sojoji, Laftanar Janaral Tukur Buratai a ranar 19 ga watan Nuwamba ya kaddamar da shirin na Exercise Crocodile Smile”
“Tuni dai shirin ya fara haifar da da mai ido. Bangaren Operation Crocodile Smile ne suka cafkeshi kuma ya amsa aikata laifin,” inji Kwamandan.
Kwamandan ya shawarci wasu safarar miyagun kwayoyi, saboda a cewarshi hakan na kara ta’addanci a cikin al’umma.
Okafor ya ce yana sayar kowanne kulli a naira 500 kuma a rana yana iya cin ribar naira dubu 10 zuwa dubu 15.
Okafor ya yi da-na-sanin aikinshi. Ya kuma shawarci wadanda suke cikin harkar su gaggauta tuba kafin dubunsu ta cika.
