Wata Mata mai suna Lilian Weta mai shekara28, wacce ke da ‘ya’ya guda uku, da kuma Millicent Auma mai shekara 29 mai yara guda biyu, sun bazu a shafukan sada zumunta na zamani, bayan da suka yi musayar mazajensu domin samun farin ciki.
Hakan ya faru bayan mijin Lilian wanda aka bayyana sunansa a matsayin Kevin ya auri Millicent a matsayin matar shi ta biyu, ashe ita kuma tana da mijinta mai suna Christopher Abwire wanda ta gudu ta bari.
Rashin jin dadin abin da mijinta ya yi mata na karo mata kishiya, Lilian ta yanke shawarar zuwa wajen Christoper, tsohon mijin Millicent, inda ta rarrashe shi akan ya aureta kuma ya amince da bukatar ta.
A cewar Christoper wanda ya yi magana da manema labarai a gidansa, kawai ya nemi matarsa Millicent ya rasa ne, sai daga baya yake samun labarin ta yi aure a wani waje. An gano cewa ma’auratan sun hadu a karshe bayan daya daga cikin matan ta taso da maganar musayar. Sai dai kuma bayan sun hadu dukan su sun yarda akan su ci gaba da zama a yadda suke.
Sabon mijin Millicen ya bayyana cewa bayan sun yi musayar yanzu yana jin dadi fiye da wancan lokacin, domin yanzu sabuwar matarshi tana sanya shi farin ciki.
