Rahotanni daga harabar Eagles Square dake babban birnin tarayya Abuja inda aka rantsar da Shugaban kasa Muhammad Buhari, na bayyana cewar tsofaffin Shugabannin Najeriya basu halarci bikin rantsar da Shugaban kasa Muhammad Buhari karo na biyu ba.
Tsofaffin Shugabannin da basu halarci bikin ba sun hadar da Chif Olushegun Obasanjo da AbdulSalam Abubakar da Ibrahim Badamasi Babangida da Goodluck Ebele Jonathan.
Har ila yau rahotan ya tabbatar da cewar an hangi tsohon Shugaba Yakubu Gowon a harabar Eagles Square din wajen bikin.
Zuwa yanzu babu wani dalili da ake dogaro da shi wanda ke da alaka da rashin zuwa tsofaffin Shugabannin gabaki dayan su.
To sai dai wani bangare a Najeriya na bayyana rashin halartar Shugabannin a matsayin adawa da sabuwar Gwamnatin Shugaban.
Sai dai idan baku manta ba an kwana biyu baa ga Fuskar Ibrahim Badamasi Babangida a wajen wani taro ko bikin siyasa ko kuma wani abu daya danganci haka ba.