Shugabannin duniya da kuma ‘yan kasar Oman sun yi makokin Sarki Qaboos bin Said Al Said, sarki mafi dadaewa kan karaga a yankin Larabawa wanda kuma ya mutu ranar Juma’a.
Firaministan Birtaniya Boris Johnson da kuma Yariman Wales sun isa wurin jana’izar sarkin a babban birnin Oman wato Muscat, wanda ya mutu yana da shekara 79.
Sarkin da ake daukarsa a matsayin mai fada-a-ji, Qaboos ya saita Oman a turbar ci gaba bayan ya hau karaga a wani juyin mulkin ruwan sanyi da ya yi wa mahaifinsa a shekarar 1970.
Tuni aka rantsar da dan uwansa Haitham bin Tariq Al Said a matsayin magajinsa.
Sarakunan kasashen Kuwait da Qatar da na Daular Larabawa har ma da na Bahrain da shugaban kasar Tunisiya da sauran shugabnni duk sun hallara a Muscat domin jana’izar tasa.
Kazalika, ana sa ran halaratar shugaban kasar Japan, wanda yake yin ziyara a yankin.
Sarki Qaboos ba shi da mai jiran gado wanda aka ayyana, amma a bisa tsari iyalansa suna da kwana uku domin zabar wanda zai gaje shi.
Ba tare da wani bata lokaci ba suka bude wani ambulan na sirri da sarkin ya bayyana wanda zai gaje shi a ciki.
Dubban mutane ne suka taru a babban Massallacin Sultan Qaboos ranar Asabar yayin jana’izarsa, inda aka binne shi a makabartar iyalan gidansu.
Har yanzu ba a tabbatar da abin da ya yi ajalin sarkin ba, amma wasu rahotanni na cewa yana fama ne da cutar daji mai shafar hanji.
Daga Shafin BBC Hausa
