RELATED POSTS
Wasu ‘yan bindiga sun yi garkuwa da wasu kananan yara guda uku a karamar hukumar Ajaokuta da ke jihar Kogi, kuma suna neman kudin fansa N100m.
Kakakin rundunar ‘yan sandan jihar Kogi, William Ayah, ya tabbatar da sace mutanen a jiya.
A cikin wata sanarwa da ya fitar, ya ce kwamishinan ‘yan sandan Edward Ebuka ya tura jami’an ‘yan sanda da ke sassa daban-daban na yaki da garkuwa da mutane tare da hadin gwiwar ‘yan banga da mafarauta domin bin diddigin masu garkuwa da mutane domin kubutar da yaran.
An yi garkuwa da yaran uku masu shekaru uku da biyar da shekaru goma a yammacin Larabar da ta gabata da misalin karfe takwas na dare a gidansu da ke Kaduna Estate, Ajaokuta Steel Township.
Shaidun gani da ido sun bayyana cewa masu garkuwa da mutanen da ke dauke da bindigogi sun yi ta harbin ma kakkautawa don tsoratar da mazauna yankin kafin su yi awon gaba da yaran.
Wani dan uwan wadanda aka sace, da ya bukaci a sakaya sunansa ya bayyana cewa ‘yan bindigar sun tuntubi ‘yan uwa inda suka bukaci a biya su Naira Milliyan 100 a matsayin kudin fansa..
Lamarin ya zo ne kwanaki kadan bayan wasu ‘yan bindiga sun kashe ‘yan sanda uku da ‘yan banga biyar a Jida-Bassa da ke karamar hukumar Ajaokuta a jihar.
A wani mataki na dakile kalubalen tsaro da ake fama da shi a jihar Kogi, gwamnan jihar Yahaya Bello ya bayar da umarnin rufe dukkanin gidajen karuwai tare da haramta amfani da abin rufe fuska a wuraren taruwar jama’a domin tantancewa.
A wani la barin kuma.
Benue: Hukumar EFCC Ta Kama Mutum 5 Da Take Zargin Masu Damfara Ta Yanar Gizo Ne
Jami’an hukumar yaki da masu yi wa tattalin arzikin kasa zagon kasa EFCC shiyyar Makurdi sun kama wasu mutane biyar da ake zargi da damfara ta yanar gizo.
An bayyana sunayensu da Adipe Philip, Akpa Alexander, Andrew Odokor, Ishegbe Samuel da Peter Ajine.
An kama wadanda ake zargin ne a wani samame da aka kai a garin Makurdi biyo bayan sahihan bayanan sirri kan zarginsu da damfarar ta Intanet.
A cewar sanarwar da hukumar ta fitar, kayayyakin da aka kwato daga hannunsu sun hada da na’urar tafi da gidanka samfarin Hp guda 2, wayoyin hannu guda 7, Power Bank, laya da wasu takardu.
“Za a gurfanar da wadanda ake zargin zuwa kotu da zarar an kammala bincike.” Sanarwar ta kara da cewa
