An kashe wani matashi a Abba da ke karamar hukumar Nwangele a jihar Imo.
Matashin mai suna Fidelis Nnadi, an ce ‘yan bindigar sun harbe shi ne a kan hanyar Okwelle zuwa Umuezealaibe.
KARANTA WANNAN LABARIN: NCDC ta bayyana sabbin wadanda suka kamu da Corona a Nigeria
Akwai Karin bayani…..
A wani labarin Kuma na daban Amma a jihar Sokoto.
Yan bindiga sun kakaba wa wasu Al’umomin Sokoto Haraji, Kuma sun bada Wa’adi
‘Yan bindiga da ke aiki a yankin Gabashin Jihar Sokoto sun sanya wa mazauna yankin harajin da za su biya kafin ranar Juma’a mai zuwa ko kuma a kai musu hari, inji jàridar Daily Trust.
Wani mazaunin yankin ya bayyana cewa ‘yan bindigar ma sun hana mutanen yankin shiga gonakinsu har sai an biya kudaden harajin da suka kayyade.
Jaridar Daly Trust ta ruwaito cewa wasu daga cikin al’ummomin sun sasanta da ‘yan bindigan, yayin da wasu ke bakin kokarinsu wajen samun kudin.
Rahotanni sun nuna cewa, barayin sun yi la’akari da yawan al’ummar kowace yanki wajen tantance adadin kudaden da za su biya.
“Wasu ana neman su biya N400,000, wasu N700,000, yayin da wasu ma kudin da bai kai haka ba akace su biya”
“A wasu Yankuna kuma ana tambayar shugabannin gidaje su biya Naira 2,000 kowanne, kuma samarin da ba su da aure suna biyan N1,000,” inji wata majiya.
Bincike ya nuna cewa an bukaci kauyukan Attalawa, Danmaliki, Adamawa, Dukkuma, Sardauna da Dangari su biya Naira 400,000 kowanne.
Sai dai mazauna kauyen Kwatsal sun biya Naira miliyan 4, an ce tuni suka biya Naira miliyan biyu daga cikin kudin ga Yan bindigan.
“An ba da dukkan kauyukan har zuwa ranar Juma’a domin su biya kudin ko kuma su fuskanci fishin Yan bindigan. Mutane suna biyan kuɗi ne saboda ba su da wani zaɓi,” inji ɗaya daga cikin majiyoyin
Wani mamba mai wakiltar mazabar Sabon Birni ta Arewa, Aminu Almustapha Gobir, ya tabbatar da faruwar lamarin, inda ya ce, babu wani hari da aka kai a Sabon Birni a ‘yan kwanakin nan, saboda mutanen yankin na bin umarnin ‘yan bindigar.
“Mutane sun gwammace su biya su zauna lafiya a cikin al’ummominsu,fiye da dogara ga hukumomin tsaro ko kuma su tafi gudun hijira,” in ji shi.
Sai dai wani tsohon shugaban karamar hukumar Sabon Birni, Idris Muhammad, ya caccaki biyan haraji ga ‘yan bindigan, yana mai cewa, yin hakan ba zai tabbatar da tsaron lafiyar mutane ba.
“Muna da kungiyoyin ‘yan bindiga daban-daban a yankin, idan kun biya haraji ga wannan kungiyar, ta yaya su sauran kungiyar ba za ku kai hari ba?”
“Haka lamarin ya faru a Gatawa da Tarah, wadanda gungun ‘yan bindiga daban-daban suka kai hari, tare da sace mutanensu da dama. ‘Yan uwansu sun biya fansa ga waɗannan ƙungiyoyi daban-daban kafin a sake su.”
“Wannan shi ne abin da zai ci gaba da faruwa, idan wata kungiya ta sanya muku haraji kuma kuka biya, wata kungiya za ta zo ta kawo muku hari, ko kuma ku sake neman harajin kuma ku biya su, ko kuma ku fuskanci mummunan sakamako daga Yan bindigan” inji shi.
Kiraye-kirayen da aka yi wa mai magana da yawun rundunar ‘yan sandan jihar Sokoto, ASP Sanusi Abubakar, da kwamishinan tsaro da harkokin sufuri, Kanar Garba Moyi (mai ritaya), dukkannin su Basu dauka ba..
