An katse hanyar sadarwar Intanet a Sudan a dai dai lokacin da ake shirye shirye zanga zanga domin neman mayar da mulki ga farar hula.
Rahoton Hukumar da ke kula da Intanet ta Kasar ya bayyana cewa an dakile yanar gizon a fadin kasar da misalin karfe takwas na safe agogon kasar, wanda kuma yayi dai dai karfe 6 a gogon GMT.
Wannan ya faru ne kasancerwar masu zanga zanga na amfani da kafafen sada zumunta wurin yada shirye-shiryen zanga zangar.
To sai dai rahotonni sun nuna cewa jamiyan tsaro sun rufe wasu gadoji da ke hada babban birnin kasar Khartoum da garuruwan Omdurman da Bahri.
Kungiyar Likitoci kasar tace akalla mutum dari da uku ne suka rasa rayukansu, sanadiyar zanga zangar ta masu raji kare dimukuradiiya, wanda ta samo asali tun a shekarar bara sakamakon adawa da juyin mulkin da sojojin kasar suka yi.
A wani labarin kuma na daban.
Shugaban kasa Muhammadu Buhari ya jaddada aniyar gwamnatinsa na gudanar da sahihin zabe a shekarar 2023.
Ya yi wannan alkawarin ne a ranar Laraba yayin ganawa da ‘yan Najeriya mazauna kasar Portugal. Buhari ya kara da cewa gwamnatin sa za ta baiwa hukumar zabe mai zaman kanta (INEC) damar gudanar da wannan aikin.
“Muna kuma fatan samun sauyi cikin sauki zuwa gwamnati mai zuwa,” in ji kakakin shugaban kasa, Garba Shehu, ya nakalto Buhari yana fadar haka a taron da aka gudanar a Lisbon.
“Kamar yadda na sha fada a baya, Gwamnatinmu ba za ta yi kasa a gwiwa ba wajen yin abubuwan da suka dace da kuma jin dadin ‘yan Najeriya na gida da waje.”
Shugaban ya bayyana zaben gwamna da aka gudanar a jihohin Anambra da Ekiti a matsayin hujjar cewa gwamnatinsa ba ta da hurumin yin katsalandan a zabe, yana mai cewa a bar ‘yan Najeriya su zabi mutanen da suke so.
Sanarwar ta Garba ta kuma ruwaito shugaban yana kira ga ‘yan kasashen waje da su inganta hadin kan Najeriya kamar yadda ya gargadi su kan amfani da kafafen sada zumunta wajen cin mutunci da tunzura jama’a.
A cewarsa, yayin da shafukan sada zumunta suka yi tasiri sosai a fannonin rayuwa da dama, amma, an yi amfani da su da mugun nufi.
Buhari ya kara da cewa, ‘’kasashe da dama ciki har da namu, sun dauki kwakkwaran matakai a kan wasu kafafen sada zumunta na zamani domin dakile wuce gona da iri da kuma hana su tada zaune tsaye a cikin al’ummarmu.
‘’Saboda haka, ina kira gare ku da ku yi amfani da kafafen sada zumunta cikin gaskiya. Dukkanmu muna son alhairi ga kasarmu da al’ummarmu, don haka mu himmantu wajen gina kasa da hadin kan al’ummarmu da al’ummarmu, ba wai zage-zage da tunzura jama’a daga nesa ba tare da boye suna ba.
Kar a Manta Gida
Dimokuradiyya ta rawaito cewa, Shugaban na Najeriya ya bayyana farin cikinsa kan nasarorin da ‘yan Najeriya ke samu a kasashen ketare ta fannoni da dama, inda ya bayyana cewa kasar da ma wasu da dama, sun nuna cewa ‘yan kasashen waje na iya zama injunan ci gaba da bunkasa.
“A kowane fanni na kokarin dan Adam, ko masana’antu na kere-kere, wasanni, kiwon lafiya, ilimi, ‘yan Najeriya mazauna kasashen waje sun bunkasa tare da yin amfani da fasaharsu wajen daukaka martabar kasarmu, ta fuskar tattalin arziki, zamantakewa, fasaha da al’adu,” inji shi. .
‘’Saboda wadannan dalilai ne ya sa wannan Gwamnati ta kafa Hukumar ‘Nigerian Diaspora Commission’ (NiDCOM) domin saukaka tare da tallafa wa kasarmu don samun nasara a kokarinmu na ganin ‘yan Nijeriya su kasance cikin hadin kai a gida da waje.
”Dole ne ku ci gaba da zama jakadunmu ga baki ɗaya a cikin ayyukanku, da halayenku. Dole ne ku yi fice kuma ku kasance mafi kyawu a cikin duk ƙoƙarin ku. Yayin nan, kuma kada ku manta da gida kamar yadda ku ne misalin da muke son aiwatarwa ga sauran duniya.”