Soludo ya sanya Dokar hana zirga-zirgar shanu da kafa a Anambra
Gwamnan jihar Anambra, Farfesa Chukwuma Soludo ya haramta zirga-zirgar shanu da kafa a kowane yanki na jihar Anambra.
Soludo, wanda ya gana da ‘yan kwamitin hana barnar shanu na jihar Anambra a gidan gwamnati da ke Awka a karshen mako, ya ce dokar hana kiwo ya yi daidai da dokar hana yawon su a jihar ta shekarar 2021, inda ya kara da cewa za a fara aiwatar da dokar ne daga watan Satumba.
KARANTA WANNAN LABARIN: Yadda Ƴan Sanda Suka Ceto Masu Garkuwa Da Mutane Daga Hannun Fusatattun Matasa
“Yanzu da muka samu dokar hana kiwo a fili, an umurci jami’an tsaro da su aiwatar da wannan sabuwar Dokar.
Soludo ya ce “Duk da cewa dokar ta kasance tun kusan shekara guda da ta gabata, masu kiwon shanu na ci gaba da yin sintiri a wasu yankuna a cikin jihar wanda ya saba wa doka.”
Tsohon Gwamnan jihar, Willie Obiano ya amince da dokar hana kiwo da a jihar Anambra a shekarar 2021, amma ya kasa aiwatar da dokar.
Soludo, yayin da yake jawabi a taron, ya ce gwamnatinsa za ta tabbatar da aiwatar da dokar nan da watan Satumba.
Ya yabawa ‘yan kwamitin na jihar Anambra bisa jajircewarsu wajen gudanar da ayyukansu, inda ya ce mutanen Anambra galibi sun zauna lafiya da makiyaya, amma dole ne makiyayan su gudanar da sana’o’insu bisa ka’ida na doka.