By Abbas Yakubu Yaura
Shari’ar mamaye gidan mai shari’a na kotun koli, Mary Odili, ta sake daukar wani sabon salo a ranar Alhamis, yayin da wanda ake zargi da babban lauyan gwamnatin tarayya (AGF) da kuma ministan shari’a, Abubakar Malami suka yi musayar kalamai.
Babban wanda ake zargin, Ajodo Lawrence, wanda ya yi takaitaccen bayanin cewa AGF ne ya tura shi da tawagarsa, amma ya ce shi mai bai wa Minista Malami shawara ne.
Ajodo, wanda ya yi ikirarin cewa shi ne babban Sufeton ‘yan sanda (CSP) ne, ya bayyana haka ne a lokacin da ‘yan sanda suka kama shi a Abuja.
Amma da sauri Malami ya mayar da martani yana mai cewa, kwakwata Ajodo bai taba zama mai ba shi shawara ba.
Jaridar Dimokuradiyya ta ruwaito cewa, a jiya ne hukumar ‘yan sandan Najeriya ta kama wadanda ake zargin ‘’yan sandan karya ne guda goma sha hudu, da suka kai farmaki gidan mai shari’a Mary Odili a ranar 29 ga watan Oktoban shekarar nan.
Rahotanni sun bayyana cewa jami’an na jabun sun samu jagorancin CSP Ajodo ne, wanda a yayin baje Kolin su, ya tabbatar da cewa, shi ba jami’in rundunar ba ne.
Sauran wadanda ake zargin a cewar Rundunar ‘yan sandan ta kasa su ne, Michael Diete-Spiff, Barista Alex Onyekuru, Bayero Lawal, da Barista Igwe Ernest, Aliyu Umar Ibrahim, Maimuna Maishanu, Ayodele Akindipe, Yusuf Adamu, Bashir Musa, ASP Mohammed Yahaya, Stanley Nkwazema (dan jarida), Shehu Jibo, Abdullahi Adamu da kuma L/CPL Mike.
Idan za’a iya tunawa Kakakin rundunar, Frank Mba ne ya baje Kolin su a sashin binciken manyan laifuka na rundunar dake Garki, a garin Abuja.
Mba, ya Kuma bayyana cewa, kwamishinan ‘yan sanda, ya bayyana wadanda ake zargin a matsayin ‘yan damfara ne ”ya Kuma ce, mutanen sun fito ne daga Bangarori daban-daban, musamman a aikin jarida, Banki da kuma jami’an tsaro.
Sannan ya ce, a halin yanzu akwai sauran wadanda ake tuhuma da suka hada da jami’an soji biyu.
Kazalika Kakakin Rundunar ya ce, dukkansu sun hada baki ne don kai samame gidan Odili bayan samun labarin cewa, alkalin kotun kolin na ajiye da makudan kudade kasashen waje a gidan ta.