Farfesa Bikash Shamer, shugaban kungiyar ‘International Economic and Management’, wanda yake kungiya ce da take lura da ilimi a kasashe 43 a duniya, ya jinjinawa shugaban Jami’ar MAAUN, Farfesa Abubakar-Gwarzo bisa jajircewarsa wajen daukaka jami’arsa.
Shamer ya yi wannan jinjinar ne a yayin da yake jawabi ta hanyar Inatanet ga daliban jami’ar bisa gagarumin nasarar da Jami’ar MAAUN ta samu na kulla alaka da jami’ar ‘International American University (IAU)’ tare da samun yarjewar hukumar kula da ilimi, kimiyya da al’adu ta majalisar dinkin duniya, UNESCO.
Ya ce yarjewar UNESCO yana da matukar amfani ga jami’ar duba da yadda jami’ar za ta kara samun karbuwa a duniya. Wanda ya ce yarjewar UNESCO din ne ya sanya jami’ar MAAUN ta samu damar kulla alaka da Jami’ar IAU, wanda kungiyarsa ke wakiltar Jami’ar a yankin Asiya da Afrika.
“Jami’ar IAU ta kwashe shekara 15 da kafuwa, tana da mazauni ne a birnin California na kasar Amurka, kuma jami’ar na karantar da darussan da suke da alaka da kasuwanci a matakin digirin farko da digiri na biyu.” Ya tabbatar.
Ya tabbatar da cewa Jami’ar ta samu sahhalewar ma’aikatar ilimi ta Amurka, kungiyar makarantu da kwalejoji ta kiristoci ta Amurka, Cibiyar lura da makarantu masu zaman kansu na gaba da Sakandare, da sauran wadansu cibiyoyin ilimi harma da hukumar lura da shige da fice ta kasar Amurka.
Ya ci gaba da cewa; ya kamata daliban jami’ar su godewa Allah bisa yadda ya ba su Farfesa Abubakar-Gwarzo, wanda yake aiki tukuru dare da rana domin ganin jami’ar ta daukaka a duniya baki daya. Ya kara da cewa sakamakon alakar da aka samu tsakanin MAAUN da IAU, duk dalibin MAAUN da ya kammala jami’ar, ko yake son karatu a jami’ar a darussan kasuwanci, zai samu damar sake karatun wani digirin din a Jami’ar IAU cikin sauki.
“wanda mutum idan ya kammala digirinsa, za a ba shi dukkanin takardunsa da shaidar kammala jami’ar.” Ya tabbatar.
Ya kuma kara da cewa mutum za a ba shi shaidarsa tare da lambobin sirri wanda zai ba shi damar amfani da manhajar dalibai ta makarantar domin shiga cikin tsohon dalibin jami’ar IAU na har abada. Sannan idan mutum na son amfani da digirinsa daga jami’ar wajen neman aiki, jami’ar ta IAU za ta tabbatar da ingancin takardunka ba tare da ka biya wadansu kudi na daban ba.
A karshe ya shawarci daliban da suke karatun darasin kasuwanci da wadanda suke da sha’awar karatun a jami’ar MAAUN da su nemi Farfesa Gwarzo domin duk wani karin bayani da taimakon da suke so.