Ministan harkokin wajen Nijeriya, Geofrey Onyeama, ya warke daga cutar korona, mako uku bayan ya killace kansa.
Onyeama, yana daya daga cikin membobin a kwamitin shugaban kasa na yaki da cutar korona, inda shima ya kamu da cutar ne a watan jiya.
Onyeama ya wallafa a shafinsa na Twitter cewa; ya gode wa ‘yan Najeriya bisa addu’o’in da suka yi masa lokacin da yake fama da cutar.
Onyeama shi ne ministan Buhari na farko da ya kamu da cutar Korona a Nijeriya. Sai dai ba shi ne jami’in gwamnati na farko da ya kamu da cutar ba, jami’an gwamnati da dama, ciki har da gwamnoni sun kamu da cutar a Nijeriya.
Har wala yau, cutar korona ce ta yi ajalin shugaban ma’aikatan fadar Shugaba Muhammadu Buhari Malam Abba Kyari a watan Afrilu.
Ya zuwa yanzu mutum 47,290 suka kamu da Cutar a Nijeriya kamar yadda bayanan NCDC ya nuna.