An bayyana cewa, rashin bin dokar kungiyar NMCN ne ya janyo kungiyar ta kwacewa ABU lasisin makarantar ta na kowon aikin jinya.
Bayanin hakan ya fito ne daga bakin Babban sakataren kungiyar ta NMCN Faruk Abubakar, inda ya ce kungiyar a shirye take don dawowa da lasisin makarantar koyon jinyar jami’ar Ahmadu Bello da ke Zariya. Kamar yadda rahoton Leadership A Yau ya tabbatar.
Farul ya sanar da hakan ne a hirar sa jaridar Daily Post a Abuja a ranar Talatar da ta gabata inda ya kara da cewa, kungiyar ta yi hakuri a yanzu saboda sa bakin da majalisar wakilan ta yi a kan maganar.
Ya kara da cewa, Majalisar wakilai ta sanya baki a kan maganar kuma hukumar makarantar ta yi abin da ya dace.
Faruk Abubakar ya bayyana cewa a shirye suke don dawo da yarjewarta ga makarantar koyon aikin jinya ta jami’ar Ahmadu Bello da ke Zariya.
Idan ba a manta ba, a watan Mayu na wannan shekarar ne NMCN ta janye yarjewarta na ingancin makarantar koyon jinyar ta jami’ar Ahmadu Bello da ke Zariya.
Janye yarjewar kungiyar ta biyo bayan zaben Hayat Gomma, malamar jinya ‘yar kasar Masar a matsayin shugabar makarantar jinyar bayan kuma ba ta da rijistar kungiyar.
Babban sakataren ya ce, Zabar Hayat Gommaa, ‘yar kasar Masar wacce ba ta da rijistar kungiyar a matsayin shugabar makarantar jinyar har na tsawon shekaru takwas ya sanya aka janye yarjeniyar.
Ya kara da cewa, kafin hakan an kuma turawa hukumar makarantar wasiku akan illar abin da suka yi, inda kungiyar ta bukaci hukumar jami’ar da ta turo takardun shaidar karatun matar don tantancewa da kuma tabbatar da ta kai yadda muke tsammani.
Ya kara da cewa, a daya bangaren majalisar tarayya ta sa baki kuma jami’ar Ahmadu Bello a bangarenta ta zabo wanda ke da rijistar kungiyar a matsayin shugaba makarantar koyon aikin jinyar, inda a namu bangaren mu kuma, a shirye suke don dawo da yarjewarmu yadda za a ci gaba da karatu.
A cewarsa, wannan zai biyo baya ne in hukumar jami’ar ta turo da wasika don sanar damu cewa ta nada wanda ya cancanta bayan kuma sun riga sun sanar da cewa sun zabi malamin jinya mai rijistar.