Gaba a yau ake sa ran za a binne tsohon shugaban Zimbabwe marigayi Robert Mugabe a wata makabarta ta musamman a kauyensu mai nisan kilomita 100 daga arewacin birnin Harare.
An yi ta ja-in-ja kan inda ya kamata a binne Mr Mugabe tsakanin iyalai da ‘yan uwansa da kuma gwamnatin kasar.
A farkon watannan ne Mugabe mai shekara 95 ya rasu wani asibiti a kasar Singapore bayan fama da rashin lafiya, tun lokacin da gawarsa ta isa kasar Zimbabwe aka killace gawar a katafaren gidansa da ke Harare.
Ana yi wa marigayi Robert Mugabe kallon wani gwarzo a nahiyar Afurka, kuma fitaccen dan siyasa a Zimbabwe amma kuma za a yi bikin binne shi a wani yanayi da ba a zaci hakan zai kasance ba.
Za a gudanar da bikin ne a kebantaccen wuri a kauyensu, inda ya fara kuruciya kama daga kora dabbobi kiwo, da noma da wasannin yara kan yi da abokai a lokacin kuruciya.
Matakin dai an dauke shi ne cikin kankanin lokaci, wasu kuma na ganin iyalai da ‘yan uwansa na son mutunta wasiyyar da ya bari ne.
Za a binne Mr Mugabe ne a makabartar da aka binne mahaifiyarsa da ‘yan uwansa, sabanin inda aka so binne shi a makabartar gwarazan kara da ke kan wani tsauni a birnin Harare.
A baya dai nan ne wurin da gwamnati ta kafe za a binne shi, a matsayin wanda ya karbo ‘yancin kai daga turawan mulkin mallaka, da jagorantar kasar na kusan shekaru 40.
Ana ganin binne shi, zai kawo karshen abin kunyar da aka yi tsakanin gwamnati da iyalansa kan wanda ya cancanci jan ragamar gagarumin bikin.
Ko da ya ke tun Mugabe na raye ya bar wasiyyar kar a bari wadanda suka jagoranci hambarar da shi daga mukamin shugaban Zimbabwe su jagoranci bikin binne shi bayan mutuwarsa.