Masu hannun jari a bankin GTBank, sun amince da biyan Naira 2.45 a matsayin riba a kan kowane hannun jari a wannan shekarar da ta kare a ranar 31 ga watan Disamba, 2018. Sun bayar da amincewar ne a babban taro na 29 na shugabannin bankin, jiya a Legas, masu hannun jarin sun yabawa kokarin da shugabannin bankin suka yi a kan yanda suka tafiyar da bankin a shekarar da ta kare ta 2018, da kuma kwata ta farko da ta kare a 31 ga watan Maris, 2019. Da take yi wa masu hannun jarin jawabi, shugabar bankin na GTBank, Osaretin Demuren, cewa ta yi, bankin ya sami gagarumar nasara a wannan shekarar duk da kalubalen da ya fuskanta a harkokin na shi. Ta yi nuni da cewa, jarin bankin yana nan da karfin sa, wanda jimillan sa ya kai kashi 23.4, kuma bankin ya amince da shawarar raba Naira 2.45 a kan kowane hannun jari guda na bankin a matsayin riba. Nazari a kan halin kui da bankin ke cikinsa a daidai lokacin da ake magana, ya nuna hannun jarin ya karu ne da kashi 3.7 a shekara zuwa Naira bilyan 434.7 daga Naira bilyan 419.2 da aka bayar da rahoto a watan Disamba, 2017. Ribar da bankin ya samu kafin fitar da riba ya kai, Naira bilyan 215.6, daidai da kashi 9.1 a kan Naira bilyan 197.7 da aka samu a shekarar ta kare a watan Disamba, 2017. Ta yi nuni da cewa, babban dubarar da bankin ya auka shi ne samar da yanayi mai kyau a nan gaba ga masu hula da bankin, ma’aikatan bankin da masu hannun jari a cikinsa a duk sassan Afrika.