Babban hafsan sojin kasar nan laftanal janar Tukur Yusuf Buratai ya gargadi dakaru na musamman da aka aike jihar Katsina da su zage damtse domin magance matsalar tsaro.
Buratai yace “ba ku da wani dalili na kin magance matsalar tsaron a jihar Katsina.”
Jaridar Punch ta ruwaito cewa, Buratai ya fadi hakan ne a jiya Lahadi yayin wata tattaunawa ta musamman da ya yi da wasu manyan shugabbanin tsaro.
Ya kuma yi musu kashedi kan mu’ammala da wadanda ke da miyagun manufofi, a yayin da yayi musu tunin cewa biyayyarsu tana ga Najeriya da kuma shugaban kasa Muhammadu Buhari.
https://dimokuradiyya.com.ng/yan-bindiga-sun-kashe-mutane-3-a-jihar-katsina/
“Baku da wata hujjar kasa cika wannan aikin na ku, saboda kun samu horo. Fatanmu shi ne matsalar rashin tsaro ta kawo karshe nan ba da dadewa ba.”
Hakan dai na zuwa a daidai lokacin da rundunar sojin da gwamnatin Najeriya ke ci gaba da fuskantar suka daga bangarori da dama a kasar nan, saboda yadda tsaro ke kara tabarbarewa, musamman ma a arewacin kasar nan.
A cikin watan da ya gabata ne Shugaba Buhari ya umurci shugabbanin tsaro da su kai farmaki na musamman a jihar Katsina, wacce ta kasance daya daga cikin jihohin da ‘yan bindiga suka fi kai wa hare-hare.
