Hukumar Kwastom Ta Kama Sinki 230 Na Tabar Wiwi A Jihar Katsina

By Abbas Yakubu Yaura

Hukumar hana fasa kwauri ta kasa (NCS), reshen jihar Katsina, ta kama wani mai suna Saifullahi Lawal dauke da sinki 230 na Tabar Wiwi na kasar Indiya.

Mukaddashin Konturola na NCS a Katsina, Mista Dalha Wada-Chedi, ne ya bayyana hakan a ranar Larabar data gabata yayin da yake mika wanda ake zargi da kuma baje kolinsu ga hukumar hana sha da fataucin miyagun kwayoyi ta kasa NDLEA.

Mista Wada-Chedi, wanda ya samu wakilcin Mataimakin Kwanturola Gudanarwar hukumar, Baffa Dambam, yace an kama wanda ake zargin tare da baje kolinsu da ke kewayen garin Shargalle dake kan hanyar Daura zuwa Katsina a karamar hukumar Mashi.

Jaridar Dimokuradiyya ta rawaito cewa Da yake amsa tambayoyi, wanda ake zargin ya amsa cewa a karo na uku ne ana irin wannan baje kolin daga Legas zuwa Katsina ba tare da sanin cewa tabar wiwi din Indiya ce ba.