A sanyin safiyar ranar Asabar ne daruruwan masu zanga-zanga suka bazama titunan unguwar Gudu dake birnin tarayya Abuja yayin da ake bikin ranar Dimokuraɗiyya.
Sai dai lamarin bai yi wa masu zanga-zangar dadi ba domin jami’an yan sanda a birnin sun hana su sakat inda aka yi ta musu ruwan hayaki mai sa hawaye.
Da ma dai gabannin fara wannan zanga-zanga sai da aka ja kunnensu, amma suka yi kirmimis suka fito, lamarin da ya harzuka jami’an na yan sanda.
Ko da yake wasu daruruwan mutane sun fito makamanciyar wannan zanga-zanga a wasu tsirarun sassan kasar nan, amma duk da haka bai hana jami’an tsaro daukar mataki ba.
Dandalin Unity Fountain wanda shine matattarar duk wanda debo damuwarsa, a yau kam ya kasance fayau ba tare da masu zanga-zangar ba har kawo lokacin da muke haɗa muku wannan rahoto.
To sai dai a makociyar Unity Fountain din wato Millennium Park, an ga wasu yan tsiraru dauke da kwalaye dake nuna mubaya’a wa shugaba Muhammadu Buhari.
