Babban bankin Najeriya (CBN) yayi ƙarin haske kan rahotannin da suka yaɗu cewa ya dakatar da asusun kamfanunninka masu hada-hada a intanet irin su OPAY da PALMPAY.
Babban bankin ya musanta waɗannan rahotannin inda ya bayyana su a matsayin ƙarya ce tsagwaronta.
KU KARANTA KUMA: Budurwa ta aike da wani saƙo mai sosa zuciya ga budurwar da saurayinta ya rabu da ita a dalilinta
A cewar rahoton jaridar Vanguard, darektan wucin gadi na fannin watsa labarai na babban bankin, Mr. Isa AbdulMumin, shine ya bayyana hakan a ranar Juma’a, 24 ga watan Maris 2023, a birnin tarayya Abuja, inda yace kanzon kurege ne kawai.
Rahotannin da akayi ta yaɗawa waɗanda aka ce sun fito daga bakin AbdulMumin, sun yi iƙirarin cewa CBN zai dakatar da asusun kamfanunnikan ne saboda ana yin amfani da su wajen aikata zamba.
Wani ɓangare na labarin na cewa:
“Idan kasan kana amfani da OPAY, PALMPAY ko ɗaya daga cikin CHINA APPs ko POS ɗin su, ka daina ajiye manyan kuɗi a ciki ko kuma ka daina amfani da su.”
“CBN na dab da dakatar da asusun su saboda ana amfani da su wajen aikata zamba.”
OPAY da PALMPAY dai sun fito sun ƙaryata waɗannan labaran inda suka ce sam CBN bata bincikar su kan aikata wani rashin gaskiya.
Bankuna Suna Bi Umarnin Bankin CBN Na Yin Aiki A Ranakun Karshe Makonni
A wani labarin na daban kuma, bankuna sun bi umurnin CBN, sun fito aiki a ranakun ƙarshen mako.
A ranar Asabar ne aka bude bankunan kasuwanci a birnin tarayya Abuja domin gudanar da kasuwanci kamar yadda babban bankin Najeriya CBN ya umarta.
Wakilin majiyar mu wanda ya sa ido a kan wasu bankunan yankin, ya ruwaito cewa an ga dimbin kwastomomi a rumfunan bankunan da ke injin cirar kudi (ATM).